काठमाडौँ ,
सरकारले कोभिड–१९ को असहज परिस्थितिमा विदेशमा अलपत्र परेका नागरिकलाई स्वदेश ल्याउने भएको छ ।
शुक्रबार प्रधानमन्त्री तथा मन्त्रिपरिषद्को कार्यालयमा बसेको कोभिड–१९ सङ्क्रमण रोकथाम तथा नियन्त्रण उच्चस्तरीय समन्वय समितिको बैठकले स्वदेश फर्कन चाहने नेपालीलाई ल्याउने निर्णय गरेको हो ।
समितिले ‘नेपाल आउने नागरिकलाई ल्याउन सम्बन्धि आदेश– २०७७’ को अनुसार कार्यदेश बनाएर ल्याउन तयारी थालेको हो ।
कस्ता व्यक्तिहरु नेपाल आउन सक्छन् ?
१. सम्बन्धित देशमा विभिन्न कारणले सजाय तोकिएर माफी पाइसकेका व्यक्तिहरु
२. नेपाल आउन अनुमति प्राप्त भएका व्यक्तिहरु
३. जुनसुकै कारणले बर्हिगमन राहदानी पाएका व्यक्तिहरु
४. आफन्तको मृत्यु भई काजक्रियाका लागि नेपाल आउनुपर्ने अवस्थामा रहेका व्यक्तिहरु
५. श्रम करार अवधि समाप्त भएर रोजगारी गुमाएका व्यक्तिहरु
६. कोभिड–१९ बाहेक अन्य कारणले स्वास्थ्यमा गम्भीर समस्या देखिएक व्यक्तिहरु
७. सुत्केरी तथा गर्भवती महिलाहरु
८. बालबालिकाहरु
९. ज्येष्ठ नागरिकहरु
१०. अपाङ्गता भएका व्यक्तिहरु
११. सरकारी सेवामा रही तालीम वा विदेशमा गएका व्यक्तिहरु (जो नेपाल आउन नपाएका छन)
१२. अध्ययन समाप्त भएका विद्यार्थीहरु
१३. कलेज वन्द भएका विद्यार्थीहरु
१४. पारिवारिक पुनर्मिलनका लागि विदेश गएका जो फर्कन इच्छुक भएकाहरु
१५. कम्पनीबाट अनिवार्य विदामा बसेकाहरु
१६. अन्तर्राष्ट्रिय संघसंस्थामा कार्यरत रहेर नेपाल आउनुपर्ने अवस्थामा रहनु भएका व्यक्तिहरु
१७. पर्यटक तथा व्यापारी राहदानीमा गएका नेपालीहरु
माथिका व्यक्तिहरुले तत मुलुकका कूटनीतिक नियोग र राजदूतावासमा निवेदन दिएपछि स्वदेश फर्काइने छ । स्वदेश फर्कनेलाई नेपाली वायुसेवा निगम र नेपालका वायु सेवाका माध्यमबाट स्वदेश ल्याइने गरी कार्ययोजना बनाइएको छ । नेपाल वायुसेवा निगम र नेपालमा रहेका वायु सेवाले नसकेको खण्डमा मात्र विदेशी वायुसेवामार्फत चार्टर गरेर ल्याइने छ ।
विदेशमा रहेका नेपालीको उद्धारमा लाग्ने हवाइ भाडा कतिपयको सम्बन्धित कम्पनी वा व्यक्ति आफैंले तिर्नुपर्नेछ भने केहीको सरकार आफैंले व्यहोर्नेछ । कार्ययोजना अनुसार विदेशबाट उद्धार गरिने हरेक व्यक्ति अनिवार्य १४ दिन क्वारेन्टिनमा बस्नुपर्नेछ । यसमा होटल क्वारेन्टिनमा बस्ने वा सम्बन्धित स्थानीय तहको क्वारेन्टिनमा जाने विकल्प हुनेछ ।
होटल क्वारेन्टिनको व्यवस्थापन संकृति, पर्यटन तथा नागरिक उड्ययन मन्त्रालयले गर्नेछ । १४ दिन क्वारेन्टिनमा बसेपछि कोरोना परीक्षण गरेर घर जान पाउनेछन् ।