काठमाडौं । बढ्दो महँगी, बेरोजगारी, आवास सङ्कट र सार्वजनिक सेवाको कमजोर अवस्थाविरुद्ध युरोपका विभिन्न देशमा प्रदर्शन चर्किएका छन्। फ्रान्स, अल्बानिया, इटाली, पोर्चुगल, स्पेन र ग्रिसमा भएका विरोध प्रदर्शनले सरकारमाथि दबाब बढाएको छ। केही स्थानमा प्रदर्शन शान्तिपूर्ण रहे पनि कतिपय ठाउँमा प्रहरी र प्रदर्शनकारीबीच झडप हुँदा हिंसात्मक अवस्था सिर्जना भएको छ।
खाद्यान्न, इन्धन र ऊर्जाको मूल्यवृद्धि तथा घरभाडा महँगिँदै जाँदा सर्वसाधारणको दैनिक जीवन प्रभावित भएको छ। सामान्य आम्दानी भएका परिवार, विद्यार्थी र युवा पुस्ताले आवासको व्यवस्था गर्न कठिनाइ भोगिरहेका छन्। यही असन्तुष्टि विभिन्न देशमा सडक प्रदर्शनका रूपमा देखिएको हो।
फ्रान्समा सार्वजनिक सेवाको अवस्था, शिक्षा क्षेत्रमा कर्मचारी अभाव र जीवनयापन खर्चविरुद्ध प्रदर्शन भएका छन्। राजधानी पेरिसबाट सुरु भएको विरोध अन्य सहरमा समेत फैलिएको छ। प्रदर्शनका क्रममा केही स्थानमा पसल लुटपाट, सवारीसाधनमा आगजनी र सार्वजनिक सम्पत्तिमा क्षति पुगेको समाचारमा उल्लेख छ। राष्ट्रपति इमानुएल म्याक्रोंले शान्तिपूर्ण विरोधको अधिकारलाई सम्मान गर्दै हिंसात्मक गतिविधि नगर्न आग्रह गरेका छन्।
अल्बानियामा प्रधानमन्त्री एदी रामाको राजीनामा माग गर्दै सरकारविरोधी प्रदर्शन चर्किएको छ। भ्रष्टाचारको आशङ्का, बेरोजगारी र शिक्षा क्षेत्रका समस्याले असन्तुष्टि बढाएको छ। राजधानी तिरानामा प्रदर्शनकारी र प्रहरीबीच झडप हुँदा प्रहरी अधिकारीहरू घाइते भएका छन् भने ठूलो सङ्ख्यामा प्रदर्शनकारी पक्राउ परेको समाचारमा जनाइएको छ। प्रधानमन्त्री रामाले भने राजीनामा नदिने अडान लिएका छन्।
इटालीको मिलानमा युद्ध र बढ्दो जीवनयापन खर्चविरुद्ध भएको प्रदर्शनका क्रममा केही प्रदर्शनकारीले प्रहरीमाथि ढुङ्गा प्रहार गरेका थिए। तोडफोड र आगजनीका घटनापछि प्रहरीले अश्रुग्यास र पानीको फोहोरा प्रयोग गरी भिड नियन्त्रण गर्ने प्रयास गरेको थियो।
पोर्चुगलको राजधानी लिस्बनमा महँगी र आवास सङ्कटविरुद्ध दशौँ हजार मानिस सडकमा उत्रिएका छन्। ट्रेड युनियन तथा आवास अधिकारका पक्षधरहरूले बढ्दो घरभाडा र दैनिक उपभोग्य वस्तुको मूल्य नियन्त्रण गर्न सरकारसँग माग गरेका छन्। पोर्तो सहरमा समेत आवासको समस्यालाई लिएर विरोध प्रदर्शन भएका छन्।
स्पेनको राजधानी म्याड्रिडमा पनि बढ्दो घरभाडा र आवासको अधिकार सुनिश्चित गर्नुपर्ने मागसहित प्रदर्शन जारी छ। सामान्य नागरिकले घर किन्न वा भाडामा लिन नसक्ने अवस्था बढ्दै गएको भन्दै प्रदर्शनकारीले आवासलाई केवल बजारको वस्तु नभई आधारभूत नागरिक अधिकारका रूपमा सुनिश्चित गर्नुपर्ने बताएका छन्।
यसैबीच, ग्रिसमा तेल प्रशोधन केन्द्रका कामदारले कार्यस्थलको सुरक्षा व्यवस्था सुधार गर्न माग गर्दै प्रदर्शन गरेका छन्। मोटर आयल कम्पनीको प्रशोधन केन्द्रमा मर्मतसम्भारका क्रममा भएको विस्फोटमा दुई कर्मचारीको मृत्यु भएपछि कामदारहरू विरोधमा उत्रिएका हुन्।
युरोपका विभिन्न देशमा प्रदर्शनका मुद्दा फरक भए पनि महँगी, रोजगारी, आवास र सार्वजनिक सेवासम्बन्धी समस्या साझा चिन्ताका रूपमा देखिएका छन्। बढ्दो खर्चसँगै आम्दानीले दैनिक आवश्यकता धान्न कठिन हुँदै जाँदा सरकारप्रति नागरिकको असन्तुष्टि बढिरहेको छ। यी प्रदर्शनले आर्थिक नीतिसँगै नागरिकको आधारभूत आवश्यकता र जीवनस्तर सुधार गर्नुपर्ने दबाबसमेत बढाएका छन्।
