काठमाडौं, भदौ २३ । मुख्य राजमार्गमा गएको बाढीपहिरोका कारण एलपी ग्यासको ढुवानी प्रभावित भएपछि काठमाडौं उपत्यकामा ग्यास अभाव देखिएको छ। तराईका बोटलिङ प्लान्टबाट उपत्यकातर्फ हुने नियमित ढुवानी अवरुद्ध हुँदा ग्यास डिलरमा उपभोक्ताको चाप बढेको छ।
नेपाल आयल निगमका प्रवक्ता एवं आपूर्ति तथा वितरण विभागका उपनिर्देशक मनोजकुमार ठाकुरका अनुसार बाढीपहिरोका कारण खाली सिलिन्डर तराई पठाएर रिफिल गरी उपत्यका ल्याउने नियमित आपूर्ति प्रणाली प्रभावित भएको हो। उपत्यकाबाहिरको आपूर्ति अवस्था भने सामान्य बन्दै गएको निगमले जनाएको छ।
मुख्य राजमार्ग अवरुद्ध भएपछि कान्ति लोकमार्ग, त्रिभुवन राजपथलगायत वैकल्पिक मार्ग प्रयोग गरेर ग्यास ल्याउने प्रयास भइरहेको छ। चितवन, गैँडाकोट, हेटौँडा तथा नवलपरासीका बोटलिङ प्लान्टबाट ग्यास भरेर वैकल्पिक बाटो हुँदै उपत्यका ल्याउने गरिएको छ।
तर वैकल्पिक सडक साँघुरा हुनुका साथै विभिन्न स्थानमा पहिरोको जोखिम रहेकाले ठूलो परिमाणमा ग्यास ढुवानी गर्न कठिन भइरहेको उद्योगीहरूले बताएका छन्। मुख्य मार्गको तुलनामा वैकल्पिक बाटोबाट ढुवानी गर्दा समयसमेत बढी लाग्ने गरेको उनीहरूको भनाइ छ।
आपूर्ति घटेपछि काठमाडौंका विभिन्न ग्यास डिलरमा लामो लाइन देखिन थालेको छ। कतिपय उपभोक्ताले १०–१५ दिनअघि नै नाम टिपाए पनि पालो पर्खिनुपरेको बताएका छन्। ग्यास आएको सूचना पाएपछि उपभोक्ता सिलिन्डर बोकेर डिलर पुग्ने गरेका छन् भने केही डिलरले सडक किनारबाट समेत वितरण गर्न थालेका छन्।
वनस्थली ग्यास ट्रेडर्सका सञ्चालक रामचन्द्र खड्काका अनुसार सामान्य अवस्थामा मासिक १० देखि १२ हजार सिलिन्डर बिक्री हुने गरे पनि अहिले मागअनुसार ग्यास प्राप्त हुन सकेको छैन। आपूर्ति कम हुँदा कतिपय उपभोक्ता रित्तै फर्किनुपरेको उनको भनाइ छ।
ग्यास अभावको असर घरायसी उपभोक्तासँगै होटल, रेष्टुरेन्ट, होस्टेल तथा साना व्यवसायमा समेत परेको छ। महालक्ष्मी गल्र्स होस्टेलकी सञ्चालिका मोना पराजुलीले ग्यास लिन घण्टौँ लाइन बस्नुपरेको र समयमा ग्यास नपाउँदा विद्यार्थीका लागि खाना पकाउन समस्या भएको बताइन्। केही होटल तथा होस्टेलले वैकल्पिक इन्धन प्रयोग गर्न थालेका छन्।
यसैबीच, साल्ट ट्रेडिङ कर्पोरेसनले पनि वैकल्पिक मार्गबाट ग्यास तथा अत्यावश्यक वस्तुको आपूर्ति कायम राख्ने प्रयास भइरहेको जनाएको छ। बाटोमा रोकिएका बुलेटलाई अन्य बोटलिङ प्लान्टतर्फ डाइभर्ट गरी ग्यास भरेर ल्याउने तथा टोकन प्रणालीमार्फत वितरण व्यवस्थित गर्ने काम भइरहेको कर्पोरेसनले जनाएको छ।
आपूर्ति प्रभावित भइरहेका बेला कृत्रिम अभाव सिर्जना गर्ने, ग्यास लुकाउने वा तोकिएको मूल्यभन्दा बढीमा बिक्री गर्ने गतिविधि हुन सक्ने भएकाले बजार अनुगमन प्रभावकारी बनाउनुपर्ने देखिएको छ।
नेपाल आयल निगमले भने सडक अवरोधका कारण तत्काल आपूर्ति प्रणालीमा समस्या देखिए पनि वैकल्पिक मार्गबाट आपूर्ति कायम राख्ने प्रयास भइरहेको जनाएको छ। निगमले उपभोक्तालाई आत्तिएर आवश्यकताभन्दा बढी ग्यास सञ्चय नगर्न आग्रह गरेको छ।
मुख्य राजमार्गको अवरोध छिट्टै हटे आपूर्ति क्रमशः सामान्य हुने अपेक्षा गरिएको छ। तर सडक अवरोध लम्बिए वैकल्पिक मार्गको सीमित क्षमता र अतिरिक्त ढुवानी समयका कारण काठमाडौंको ग्यास आपूर्तिमा थप दबाब पर्न सक्ने व्यवसायीहरूले बताएका छन्।
हुकलाइन : सडकमा पहिरो खस्यो, त्यसको असर काठमाडौंका भान्सासम्म पुगेको छ—ग्यासका लागि डिलरमा उपभोक्ताको लामो लाइन लाग्न थालेको छ।
