असुनसियोन ।पाराग्वेमा चर्किएको गम्भीर बैङ्किङ सङ्कट र करिब ३० लाख निक्षेपकर्ताको बचत रकम रोकिएपछि उत्पन्न जनआक्रोशका बीच राष्ट्रपति सान्टियागो पेनाले राजीनामा दिएका छन्। तर, संसद्ले उनको राजीनामा अझै स्वीकृत नगरेकाले उनी पदमै रहेकै अवस्थामा संसद्ले उनीविरुद्ध महाभियोग प्रक्रिया अघि बढाएको छ।
विवादको मुख्य जड पाराग्वेको केन्द्रीय बैङ्कले गम्भीर पुँजी अभाव देखिएपछि राष्ट्रपति पेनासँग प्रत्यक्ष सम्बन्ध रहेको ‘युएनो बैङ्क’ (Banco Ueno) लाई आफ्नो नियन्त्रणमा लिनु हो। बैङ्क नियन्त्रणमा लिएसँगै पेन्सनभोगीसहित लाखौँ सर्वसाधारण निक्षेपकर्ताहरू आफ्नो बचत रकम निकाल्नबाट वञ्चित भएका छन्।
बैङ्किङ सङ्कट गहिरिएसँगै राजधानी असुनसियोनस्थित संसद् भवनबाहिर हजारौँ नागरिकले प्रदर्शन गर्दै आफ्नो रकम तत्काल फिर्ता गर्न माग गरिरहेका छन्। प्रदर्शनका क्रममा प्रहरी र नागरिकबीच झडप हुँदा स्थिति नियन्त्रणमा लिन प्रहरीले अश्रुग्यास र पानीको फोहोरा प्रयोग गरेको थियो।
बैङ्कमा राष्ट्रपतिको व्यक्तिगत स्वार्थको द्वन्द्व (Conflict of Interest) र पदको दुरुपयोग भएको निष्कर्ष निकाल्दै संसद्का सांसदहरूले सर्वसम्मतिले पेनाविरुद्ध महाभियोग प्रक्रिया अघि बढाउने निर्णय गरेका छन्। चौतर्फी दबाबपछि राष्ट्रपति पेनाले सामाजिक सञ्जालमार्फत जनतासँग माफी माग्दै निक्षेपकर्ताको बचत सुरक्षित राख्नु नै आफ्नो पहिलो प्राथमिकता भएको स्पष्टीकरण दिएका छन्।
यसअघि विवाद समाधानका लागि केन्द्रीय बैङ्कका अध्यक्ष कार्लोस कार्भालोले राजीनामा दिएका थिए भने निक्षेपकर्ताको रकम फिर्ता गर्न पाँच दिनको समयसीमा तोकिएको थियो। तर, उक्त कदमले पनि जनआक्रोश मत्थर पार्न सकेन।
संसद्ले शुक्रबारदेखि राष्ट्रपति पेनाविरुद्धको महाभियोग सुनुवाइ प्रारम्भ गर्ने तयारी गरेको छ। महाभियोग पारित भई राष्ट्रपति पद रिक्त भएमा संवैधानिक व्यवस्थाअनुसार उपराष्ट्रपति पेड्रो एलियानाले मुलुकको नेतृत्व सम्हाल्नेछन्।
