काठमाडौँ– नेपाली कांग्रेसका नेता चन्द्र भण्डारीले नयाँ पुस्तालाई नेतृत्व सुम्पने साहस नै दलहरुको सुधारको सही बाटो हुने बताएका छन् ।
उनले आज सामाजिक सञ्जाल फेसबुकमार्फत विगतका गल्तीहरूको आत्मसमीक्षा गर्दै जनतासँग माफी मागेर नयाँ पुस्तालाई नेतृत्व सुम्पनु अहिलेको आवश्यकता भएको उल्लेख गरेका छन् ।
उनले जनताको वास्तविक आवश्यकता भन्दा पनि सत्ताको दाउपेच र चुनावी समीकरणलाई मात्र प्राथमिकता दिएको व्यंग्य गर्दै जनताको स्वाद नबुझी खोलिएका दोकान चल्न नसक्ने बताए ।
उनले लेखेका छन्– ‘जनताको स्वाद नबुझी खोलिएका ‘दुकान’ पुरानै सेल्सम्यान र मालिकले जति सिँगार गरे पनि चल्दैनन् ।’
नेता भण्डारीले नेपालका राजनीतिक पार्टीहरू कोसँग मिल्ने/नमिल्ने भन्ने कुरा जनताको चासोको विषय नभएकाले सत्तामा हुँदा गुमेको विश्वास फिर्ता गर्ने मार्ग खोज्न आग्रह गरेका छन् । उनले भनेका छन्– सत्तामा हुँदा गुमेको विश्वास पिँढीमा बसेर गरिने गफले फर्किँदैन ।’
उनले आम नागरिकले अब पुरानै आश्वासन नभई ठोस परिणाम खोजिरहेको सङ्केत गरेका छन् । दलका सिद्धान्त र विचारलाई समयसापेक्ष परिवर्तन नगर्ने र नेतृत्वमा अनुहार नबदल्ने हो भने नयाँ पार्टी वा पुरानै संरचनाले जनविश्वास जित्न कठिन हुने उनको तर्क छ ।
नेता भण्डारीले मुलुकमा अन्धभक्त, चाप्लुसी र मीठो कुरा गरेर जनतालाई भ्रममा पार्ने प्रवृत्ति घातक रोग भएको उल्लेख गरेका छन् । उनले लेखेका छन्, ‘जिब्रोको चाकडी त रोग नै हो नि !’
