आज अर्थात् १२ अगस्ट २०२६ मा दुर्लभ खग्रास सूर्यग्रहण लाग्दैछ। यो ग्रहणको पूर्ण स्वरूप ग्रिनल्यान्ड, आइसल्यान्ड, उत्तरी रुस, उत्तर आन्ध्र महासागर तथा स्पेन र पोर्चुगलका केही भूभागबाट देखिनेछ।नेपालसहित भारत र एसियाका अधिकांश भागबाट भने यो सूर्यग्रहण देखिने छैन। चन्द्रमाको पूर्ण छाया पर्ने क्षेत्र उत्तरी गोलार्धका उच्च अक्षांश हुँदै जाने भएकाले नेपाल उक्त क्षेत्रमा पर्दैन।
नासाका अनुसार सन् १९९९ पछि मुख्य भूमि युरोपबाट देखिने यो पहिलो पूर्ण सूर्यग्रहण हो। पूर्ण ग्रहणको मार्गमा करिब १ करोड ५० लाख मानिस पर्ने अनुमान गरिएको छ भने उत्तरी गोलार्धका विभिन्न स्थानबाट आंशिक ग्रहण करिब ९८ करोड मानिसले देख्न सक्नेछन्।
ग्रहण उत्तरी रुसबाट सुरु हुँदै ग्रिनल्यान्ड, आइसल्यान्ड र उत्तर आन्ध्र महासागर पार गरेर स्पेनसम्म पुग्नेछ। अधिकांश स्थानमा पूर्ण ग्रहण दुई मिनेटभन्दा कम समय रहनेछ।स्पेनका लियोन, जारागोजा र भ्यालेन्सियालगायतका सहरबाट पूर्ण ग्रहण देखिनेछ। आइसल्यान्डको रेक्जाभिकबाट पनि पूर्ण ग्रहण अवलोकन गर्न सकिनेछ। युरोपका पेरिस, लन्डन र बर्लिनबाट भने आंशिक ग्रहण देखिनेछ।
सूर्यग्रहणमा चन्द्रमा सूर्य र पृथ्वीको बीचमा आएर सूर्यको प्रकाश छेक्छ। चन्द्रमाले सूर्यको उज्यालो भाग पूर्ण रूपमा ढाक्दा खग्रास सूर्यग्रहण हुन्छ।नेपालबाट प्रत्यक्ष ग्रहण देखिने छैन। त्यसैले नेपाली दर्शकले नासा तथा अन्य विश्वसनीय खगोलीय संस्थाका अनलाइन लाइभ स्ट्रिमिङमार्फत ग्रहण हेर्न सक्नेछन्।
ग्रहण हेर्दा विशेष सौर्य अवलोकन चस्मा वा प्रमाणित सौर्य फिल्टर प्रयोग गर्नुपर्नेछ। साधारण सनग्लास प्रयोग गरेर सूर्यतर्फ हेर्नु आँखाका लागि जोखिमपूर्ण हुन्छ।यसपछि अर्को उल्लेखनीय पूर्ण सूर्यग्रहण २ अगस्ट २०२७ मा हुनेछ, जसको पूर्णताको मार्ग दक्षिणी स्पेन, उत्तर अफ्रिका, साउदी अरब र यमनसम्म पुग्नेछ।
