काठमाडौं । नेपाल प्रहरीको साइबर ब्यूरोले बैंकबाट फोन गरेको भन्दै KYC अपडेटका नाममा ठगी गर्ने चार जनालाई पक्राउ गरेको छ। पक्राउ पर्नेमा बारा देउताल गाउँपालिका–४ का २२ वर्षीय अभय तिवारी, नवलपरासी (बर्दघाट सुस्ता पश्चिम) रामग्राम नगरपालिका–१६ का २२ वर्षीय जयकुमार केवट, रामग्राम नगरपालिका–१७ का २२ वर्षीय विद्यासागर केवट र पर्सा वीरगञ्ज महानगरपालिका–३ का २७ वर्षीय कुवेर थापा रहेका छन्। साइबर ब्यूरोका प्रवक्ता एवं प्रहरी उपरीक्षक दिलीपकुमार गिरीका अनुसार पक्राउ परेकाहरूले आफू बैंकबाट बोलेको भन्दै विशेषगरी बहालवाला तथा सेवानिवृत्त कर्मचारीलाई लक्षित गरी फोन तथा ह्वाट्सएप कल गर्ने गरेका थिए।
प्रहरीका अनुसार उनीहरूले KYC अपडेट गर्नुपर्ने भन्दै पीडितलाई मोबाइलको स्क्रिन सेयर गर्न लगाउने गरेका थिए। त्यसक्रममा ओटीपी कोड प्राप्त गर्ने वा पीडितसँगै ओटीपी कोड माग्ने र त्यसको प्रयोग गरी बैंक खातामा अनधिकृत पहुँच पुर्याउने गरेको अनुसन्धानबाट खुलेको छ।खातामा पहुँच पाएपछि पीडितको रकम अन्य बैंक खातामा रकमान्तर गरी ठगी गर्ने गरेको प्रहरीको भनाइ छ।
पक्राउ परेका चारै जनाविरुद्ध विद्युतीय कारोबार ऐन, २०६३ अन्तर्गत अनधिकृत पहुँच तथा विद्युतीय माध्यमसम्बन्धी ठगी कसुरमा अनुसन्धान भइरहेको छ।उनीहरूलाई काठमाडौं जिल्ला अदालतबाट पाँच दिनको म्याद थप अनुमति लिई थप अनुसन्धान अघि बढाइएको साइबर ब्यूरोले जनाएको छ।प्रहरीले बैंक तथा वित्तीय संस्थाको नाममा फोन वा अनलाइन सम्पर्क गरी ओटीपी, पासवर्ड, पिन तथा अन्य संवेदनशील विवरण मागेमा उपलब्ध नगराउन सर्वसाधारणलाई आग्रह गरेको छ।
