अमेरिकी राष्ट्रपति डोनाल्ड ट्रम्पले चिनियाँ उत्पादनमा आयात शुल्क बढाएसँगै विश्वका दुई ठूला अर्थतन्त्रबीच ‘व्यापार युद्ध’ चर्कने देखिएको छ । आयात कर बढाउने ट्रम्पको निर्णयपछि चीनले अमेरिकासँग ‘जस्तोसुकै युद्ध’ का लागि तयार रहेको बताएको हो ।
‘यदि अमेरिकाले युद्ध नै चाहेको हो भने, चाहे त्यो आयात शुल्कसम्बन्धी होस् वा व्यापार युद्ध वा जस्तोसुकै प्रकारको अन्य युद्ध, हामी अन्त्यसम्म लड्न तयार छौं,’ चिनियाँ विदेश मन्त्रालयले भनेको छ ।
विदेश मन्त्रालयको टिप्पणीलाई अमेरिकाको वासिङ्टनस्थित चिनियाँ दूतावासले सामाजिक सञ्जाल एक्समा पुनः पोस्ट गरेको छ । अमेरिकी राष्ट्रपति ट्रम्पले मंगलबारदेखि लागू हुने गरी चीनबाट आयात हुने सामानमा १० प्रतिशत कर थप गरेका थिए । त्यसको बदलामा चीनले तत्कालै अमेरिकी कृषिजन्य वस्तुहरूमा १० देखि १५ प्रतिशतसम्म आयात शुल्क लगाइसकेको छ ।
राष्ट्रिय जनकंग्रेसको वार्षिक सम्मेलनका लागि चिनियाँ नेताहरू राजधानी बेइजिङमा भेला भइरहेका बेला चीनले अमेरिकालाई चेतावनी दिएको हो । जनकंग्रेसको तेस्रो पूर्ण सत्रमा प्रतिवेदन पेस गर्दै चिनियाँ प्रधानमन्त्री ली छ्याङले चीनको रक्षा खर्च ७.२ प्रतिशतले बढाउने घोषणा गरेका छन् ।
