काठमाडौं । ट्रेकिङ एजेन्सिज एशोसिएशन अफ नेपाल (टान) को ४७औं वार्षिक साधारण सभा आगामी भदौ १५ गते आइतबार काठमाडौंमा हुने भएको छ । संघको २०८२ साउन ३० गते बसेको कार्यसमितिको १२औं पूर्ण बैठकले उक्त निर्णय गरेको हो ।
साधारण सभा गैरीधारास्थित एलिस रिसेप्सनमा बिहान ९ बजेबाट सुरु हुने टानका महासचिव सोनाम ग्याल्जेन शेर्पाले जानकारी दिनुभयो । उहाँका अनुसार सभामा संघको वार्षिक प्रगति प्रतिवेदन, आगामी वर्षको कार्यक्रम तथा योजना, आर्थिक प्रतिवेदन र अनुमानित बजेट प्रस्तुत गरिनेछ । त्यस्तै आर्थिक वर्ष २०८२/०८३ का लागि लेखा परीक्षकको नियुक्ति र पारिश्रमिक तोक्ने विषयमा पनि छलफल हुने छ ।
साधारण सभाबाट माइन्युटमा हस्ताक्षर गर्न दुई जना प्रतिनिधि चयन गर्ने, विधान तथा विनियमावली संशोधनसम्बन्धी प्रस्ताव प्रस्तुत गर्ने लगायतका विषयमा पनि निर्णय हुने टानले जनाएको छ ।
महासचिव शेर्पाले सबै सदस्यलाई तोकिएको मिति, स्थान र समयमा उपस्थित भई संघका नीतिगत तथा कार्यक्रमगत निर्णयमा सहभागी हुन आह्वान गर्नुभएको छ ।
