काठमाण्डौ – नेपाली कांग्रेसको केन्द्रीय नीति, अनुसन्धान तथा प्रशिक्षण प्रतिष्ठानले सुनसरीको लौकहीमा आयोजना गरेको कोशी प्रदेशस्तरीय दुई दिने परामर्श कार्यशाला २८ बुँदे ‘कोशी संकल्प’ जारी गर्दै सम्पन्न भएको छ ।
हिजो र आज चलेको कार्यशालामा कोशी प्रदेश र पालिका सरकारका जनप्रतिनिधि तथा पार्टीका केन्द्रदेखि पालिकासम्मका नेतृत्व सहभागी थिए । जारी संकल्पमा नागरिकमुखी जवाफदेही सरकार, वित्तीय अनुशासन, घरआँगनमा सेवा प्रवाह, स्वास्थ्य बीमा विस्तार र आध्यात्मिक तथा साहसिक पर्यटन विकासलाई प्राथमिकतामा राखिएको छ ।
यसैगरी विराटनगर–इटहरी औद्योगिक कोरिडोरलाई विशेष आर्थिक क्षेत्रका रूपमा सञ्चालन गर्ने, भूमिहीन दलित तथा सुकुम्वासीको सम्मानजनक पुनस्र्थापना गर्ने र संघ, प्रदेश तथा पालिकाबीच समन्वय सुदृढ गर्ने प्रतिबद्धता पनि संकल्पमा समेटिएको छ ।
पार्टी संगठन सुदृढीकरणका लागि ‘जरा अभियान’लाई तीव्रता दिने र पार्टी–सरकार समन्वय संयन्त्र तत्काल गठन गर्ने पनि यस संकल्पका प्रमुख बुँदा रहेका छन् ।
यसैबीच कांग्रेस सभापति गगन थापा, पार्टी एकताका लागि विशेष महाधिवेशन बाहिर रहेका तत्कालीन कार्यवाहक सभापति पूर्णबहादुर खड्का र नेता शेखर कोइरालालाई वरिष्ठ नेता दिन तयार हुनुभएको छ ।
दुवै नेतालाई वरिष्ठ नेतासहित केन्द्रीय कार्यसमितिमा आउन प्रस्ताव गरिएको महामन्त्री प्रदीप पौडेलले बताउनुभएको हो । खड्का र कोइरालाले व्यक्तिगत तहमा नभएर सामूहिक एकताको वकालत गर्दै आउनुभएको छ ।
