ट्राफिक नियम उल्लंघन गर्ने दुई हजार भन्दा बढी कारबाहीमा, राजस्वमा १३ लाखभन्दा बढी संकलन

पछिल्लो २४ घण्टाको अवधिमा काठमाडौँ उपत्यकामा ट्राफिक नियम उल्लंघन गर्ने दुई हजार ४२ सवारी चालक कारबाहीमा परेका छन्। ट्राफिक नियम उल्लंघन गर्ने चालकहरूबाट जरिवानाबापत राज्यकोषमा १३ लाख ३३ हजार रुपैयाँ राजस्व दाखिला भएको काठमाडौँ उपत्यका ट्राफिक प्रहरी कार्यालयले जनाएको छ।

कार्यालयका अनुसार कारबाहीमा पर्नेमा मादकपदार्थ सेवन गरी सवारी चलाउने ५६ जना, नियमविपरीत ‘राइड सेयरिङ’ गर्ने १२१ जना, ट्राफिक संकेत बत्ती उल्लंघन गर्ने ८७ जना र तीव्र गतिमा सवारी चलाउने १७३ जना रहेका छन्।

त्यसैगरी, लेन अनुशासन पालना नगर्ने १२८ जना, निषेधित क्षेत्रमा हर्न बजाउने ८७ जना, सडकपेटीमा पार्किङ गर्ने ८५ जना र एकतर्फी सडकमा सवारी चलाउने ५६ जना कारबाहीमा परेका छन्। अन्य विभिन्न ट्राफिक नियम पालना नगर्ने एक हजार २४९ जना चालकलाई पनि कारबाही गरिएको प्रहरीले जनाएको छ।