अमेरिकी राष्ट्रपति डोनाल्ड ट्रम्पसँगको भेटपछि युक्रेनी राष्ट्रपति भोलोदिमिर जेलेन्स्कीले प्याट्रियट रक्षा प्रणालीको सहउत्पादन र हवाई सुरक्षा सुदृढीकरणमा आशावाद व्यक्त गर्नुभएको छ।
युक्रेनी राष्ट्रपति भोलोदिमिर जेलेन्स्कीले अमेरिकी राष्ट्रपति डोनाल्ड ट्रम्पसँग भएको भेटवार्तापछि युक्रेनको हवाई सुरक्षा क्षमता विस्तारका लागि प्याट्रियट हवाई रक्षा प्रणालीको सहउत्पादन र उत्पादन इजाजतपत्र प्राप्त हुनेमा आशावाद व्यक्त गर्नुभएको छ। उहाँले रूसविरुद्ध जारी युद्धमा युक्रेनको प्रतिरक्षा क्षमता सुदृढ बनाउन अमेरिकी सहयोग निर्णायक रहने बताउँदै युद्धको मोर्चामा रूसको रणनीतिक अग्रता कमजोर बन्दै गएको दाबी गर्नुभयो।
ह्वाइट हाउसमा एक घण्टाभन्दा बढी चलेको भेटपछि फक्स न्युजसँगको अन्तर्वार्तामा जेलेन्स्कीले राष्ट्रपति ट्रम्पसँग निकै सकारात्मक छलफल भएको बताउनुभयो। उहाँका अनुसार ट्रम्पले प्याट्रियट हवाई रक्षा प्रणाली उत्पादनका लागि आवश्यक इजाजतपत्र उपलब्ध गराउने सहमति जनाउनुभएको छ। त्यसपछि आफूले अमेरिकाका प्रमुख रक्षा उद्योगका प्रतिनिधिसँग सहउत्पादनको सम्भावनाबारे पनि छलफल गरेको जानकारी दिनुभयो।
भेटपछि राष्ट्रपति ट्रम्पले सामाजिक सञ्जालमार्फत बैठक सफल भएको उल्लेख गर्दै दुवै पक्षबीच विभिन्न महत्त्वपूर्ण विषयमा सहमति र छलफल भएको जनाउनुभएको थियो।
युक्रेन–रूस युद्ध अन्त्यका लागि अमेरिकी नेतृत्वमा भएका कूटनीतिक प्रयासले अपेक्षित सफलता हासिल गर्न नसकिरहेका बेला दुवै पक्षले लामो दूरीका आक्रमणलाई तीव्र बनाएका छन्। यस्तो अवस्थामा ब्यालिस्टिक मिसाइल रोक्न सक्षम प्याट्रियट प्रणालीको थप आपूर्ति र उत्पादन क्षमता विस्तारलाई युक्रेनले प्राथमिकतामा राखेको छ।
संयुक्त राष्ट्रसङ्घका अनुसार गत महिना अप्रिल २०२२ यताकै सबैभन्दा धेरै युक्रेनी नागरिकको ज्यान गएको महिना बनेको छ, जसको प्रमुख कारण रूसले ब्यालिस्टिक मिसाइल आक्रमण बढाउनु रहेको उल्लेख गरिएको छ।
यसैबीच, राष्ट्रपति ट्रम्प पुनः सत्तामा फर्किएपछि युक्रेनलाई अमेरिकी हतियारको प्रत्यक्ष आपूर्ति सीमित गर्दै युरोपेली मुलुकमार्फत खरिद गर्ने नीति अघि बढाउनुभएको छ। यद्यपि अमेरिका अझै पनि युक्रेनलाई खुफिया सूचना र स्टारलिङ्क स्याटेलाइट सञ्चार प्रणालीमा पहुँच उपलब्ध गराउने प्रमुख साझेदारका रूपमा रहेको छ।
फेब्रुअरी २०२५ मा ह्वाइट हाउसमा भएको सार्वजनिक विवादपछि चिसिएको ट्रम्प–जेलेन्स्की सम्बन्ध पछिल्ला महिनामा सुधारोन्मुख देखिएको छ। यसैबीच, युक्रेनले रूसका तेल डिपो, रिफाइनरी तथा इन्धन पूर्वाधारमा ड्रोन आक्रमणलाई तीव्र बनाएको छ भने रूसले पनि ओडेसा बन्दरगाहसहित विभिन्न क्षेत्रमा ड्रोन र मिसाइल आक्रमणलाई निरन्तरता दिएको छ।
