पोखरा — बाढी प्रभावित जिल्लाबाट पोखरा ल्याइएका पहिचान हुन नसकेका शवको व्यवस्थापन सुरु गरिएको छ। तनहुँ, गोरखा, धादिङ र पूर्वी नवलपरासीबाट ल्याइएका १०२ शवमध्ये १९ वटाको पहिचान भएपछि बाँकी ८३ शवको व्यवस्थापन थालिएको हो।
पहिचान हुन नसकेका शवबाट डीएनए नमुना संकलन गरी आवश्यक विवरणसहित ट्याग लगाएर पोखरा महानगरपालिका–१६ स्थित सेती नहर छेउको वन क्षेत्रमा जमिनमुनि व्यवस्थापन गर्न थालिएको जनाइएको छ।
बाढी तथा पहिरोका कारण प्रभावित जिल्लाका विभिन्न स्थानबाट उद्धार गरिएका शव पोखरा ल्याएर राखिएको थियो। लामो समयसम्म पहिचान हुन नसकेका शवको वैज्ञानिक विधिबाट विवरण सुरक्षित राख्दै व्यवस्थापन गर्ने प्रक्रिया अघि बढाइएको हो।
सम्बन्धित निकायले शव व्यवस्थापनअघि डीएनए नमुना संकलन गरेकाले भविष्यमा आफन्तले खोजी गरेमा पहिचान गर्न सहयोग पुग्ने जनाएको छ। शवमा ट्याग लगाएर आवश्यक विवरण सुरक्षित राखिएकाले पहिचानको प्रक्रिया थप सहज हुने अपेक्षा गरिएको छ।
बाढीपछि विभिन्न जिल्लामा ठूलो संख्यामा मानवीय क्षति भएको छ। उद्धार तथा खोजीका क्रममा फेला परेका शवमध्ये कतिपयको पहिचान तत्काल हुन नसक्दा व्यवस्थापन चुनौतीपूर्ण बनेको थियो।
शव व्यवस्थापनका क्रममा मानवीय संवेदनशीलता तथा पहिचानको सम्भावनालाई ध्यानमा राखेर आवश्यक प्रक्रिया अपनाइएको सम्बन्धित निकायले जनाएको छ।
