काठमाडौं । नेपाल प्रिमियर लिग (एनपीएल) क्रिकेटमा आज दुई खेल हुँदैछन् । कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने पहिलो खेलमा विराटनगर किंग्स र पोखरा एभेन्जर्सबीच प्रतिस्पर्धा हुनेछ ।खेल दिउँसो साढे १२ बजे सुरु हुनेछ । पाँच खेल खेलेको विराटनगरले दुई खेलमा जित र तीन खेलमा हार बेहोरेको छ । चार अंकसहित विराटनगर अंक तालिकाको छैटौँ स्थानमा छ ।
पोखरा भने पाँच खेलमध्ये एक खेलमा मात्र विजयी भएको छ । चार खेलमा पराजित पोखरा दुई अंकसहित अंक तालिकाको पुछारमा रहेको छ । त्यसैले आजको खेल दुवै टोलीका लागि महत्वपूर्ण हुनेछ ।यसैगरी आजै दिउँसो साढे ४ बजे कर्णाली याक्स र लुम्बिनी लाइन्सबीच दोस्रो खेल हुनेछ ।
कर्णालीले पाँच खेलमा दुई जित र तीन हारसहित चार अंक जोडेको छ । समान पाँच खेल खेलेको लुम्बिनीले तीन खेलमा जित र एक खेलमा हार बेहोरेको छ । एक खेल भने वर्षाका कारण रद्द भएपछि दुवै टोलीले एक–एक अंक बाँडेका थिए ।
लुम्बिनी सात अंकसहित अंक तालिकाको तेस्रो स्थानमा रहँदा कर्णाली चार अंकसहित सातौँ स्थानमा छ । आजको खेलमा जित निकाल्दै कर्णाली अंक तालिकामा सुधार गर्ने लक्ष्यमा हुनेछ भने लुम्बिनी आफ्नो बलियो लयलाई निरन्तरता दिने प्रयासमा रहनेछ ।
