काठमाडौं- समाज कल्याण परिषद् अन्तर्गतको भृकुटीमण्डप परिसरमा रहेका स्टल, बुथ र भवनहरूको करोडौं रुपैयाँ भाडा उठ्न बाँकी रहेको पाइएको छ ।
परिषद्ले सार्वजनिक गरेको पछिल्लो विवरणअनुसार विभिन्न कहलिएका संघ–संस्था, मिडिया क्लव र राजनीतिक संगठनहरूले लामो समयदेखि भाडा नबुझाई वक्यौता राखेका छन् ।
सोमबारबाट भाडा नबुझाउने स्टलहरुमा परिषद्ले ताल्चा लगाएको छ । परिषद्को तथ्यांकअनुसार सबैभन्दा धेरै वक्यौता राख्नेमा मिडिया र सामाजिक संस्थाहरू अग्रपंक्तिमा देखिएका छन् ।
रिपोर्टर्स क्लव नेपालले स्टल नं. २२ को मात्रै ७३ लाख ४० हजार ९०१ रुपैयाँ ७५ पैसा भाडा बुझाउन बाँकी छ । त्यस्तै, नेपाल पत्रकार महासंघको नाममा स्टल नं. ७ को ३३ लाख ७ हजार ४२१ रुपैयाँ ६५ पैसा वक्यौता देखिएको छ ।
राजनीतिक दल निकट संगठनहरूले पनि सरकारी सम्पत्तिको प्रयोग गरेर भाडा तिर्न अटेरी गरेको पाइएको छ । नेकपा एमाले निकट विद्यार्थी संगठन अनेरास्ववियुले स्टल नं. ६० र ६१ को भाडा २०७७ साल चैतदेखि नै नबुझाएको परिषद्को विवरणमा उल्लेख छ । राष्ट्रिय अपाङ्ग महासंघले १ करोड १६ लाख ३२ हजार रुपैयाँ तिर्न बाँकी छ ।
विवरणमा सबैभन्दा ठूलो रकम काठमाडौं उपत्यका सार्वजनिक पुस्तकालय समाजको नाममा देखिएको छ । यस संस्थाले दुईवटा स्टलको गरी कुल १ करोड रुपैयाँभन्दा बढी बक्यौता राखेको देखिन्छ ।
