सार्वजनिक खरिद अनुगमन कार्यालयले चार सार्वजनिक निकायको सिफारिसका आधारमा चार निर्माण व्यवसायी तथा आपूर्तिकर्तालाई कालोसूचीमा राखेको छ। कार्यालयले शुक्रबार सूचना जारी गर्दै सार्वजनिक खरिद ऐन, २०६३ को दफा ६३ बमोजिम उक्त निर्णय लागू गरिएको जनाएको हो।
कार्यालयका अनुसार कालोसूचीमा परेका कम्पनी तथा संयुक्त उपक्रमले तोकिएको अवधिसम्म कुनै पनि सार्वजनिक निकायको खरिद प्रक्रियामा सहभागी हुन पाउने छैनन्।
कालोसूचीमा पर्नेमा ईश्वरणी कन्स्ट्रक्सन एन्ड सप्लायर्स प्रालि, काठमाडौं एक वर्ष ६ महिनाका लागि परेको छ। त्यसैगरी अपन निर्माण सेवा, ललितपुर दुई वर्षका लागि कालोसूचीमा परेको छ।
यस्तै, खड्क निर्माण सेवा, बझाङ, एन.एल. कन्ट्रक्सन एन्ड सप्लायर्स प्रालि, काठमाडौं र माण्डौँ निर्माण सेवा (संयुक्त उपक्रम) लाई तीन वर्षका लागि कालोसूचीमा राखिएको छ। एम.आर.–आरजे जेभी, सिराहा, आशिष कन्ट्रक्सन, चितवन र आशिष कन्ट्रक्सन मल्टिपर्पोज प्रालि, उदयपुर (संयुक्त उपक्रम) पनि तीन वर्षका लागि कालोसूचीमा परेका छन्।
कार्यालयका अनुसार यी निर्माण व्यवसायी तथा आपूर्तिकर्तालाई क्रमशः विराटनगर महानगरपालिका, सूर्या नगरपालिका, छबिसपाथिभेरा गाउँपालिका (बझाङ) र सिँचाइ तथा जलस्रोत व्यवस्थापन आयोजना, राजविराज को सिफारिसका आधारमा कालोसूचीमा राखिएको हो।
