काठमाडौं – फिल्म ‘लालीबजार’ टिमलाई छलफलका लागि सर्वोच्च अदालतले बोलाएको छ ।
न्यायाधीशहरू कुमार रेग्मी र नृपध्वज निरौलाको संयुक्त इजलासले विपक्षीहरूलाई छलफलका लागि बोलाउन मंगलबार आदेश दिएको हो ।
उच्च अदालत पाटनले फिल्म ‘लालीबजार’ प्रदर्शनमा अनुमति दिएपछि डा. रोशनी बादी सर्वोच्चको ढोका ढकढकक्याउन पुगेकी हुन् ।
उनले वैशाख २५ गते सर्वोच्चमा रिट दर्ता गरेकी थिइन् । सर्वोच्चमा उनले उच्च अदालत पाटन , सञ्चार तथा सूचना प्रविधि मन्त्रालय, चलचित्र जाँच समिति, लालीबजार चलचित्र निर्माण टोली षड्कोण आर्ट्स र चलचित्र विकास बोर्डलाई विपक्षी बनाएकी थिइन् ।
बादी समुदायको चरित्रमा प्रश्न उठ्ने गरी फिल्म बनाइएको भन्दै उनले प्रदर्शन रोक्न दबाब बढाइरहेकी छन् ।
२९ बैशाख २०८३, मंगलवार १६:३४ मा प्रकाशित
