काठमाडौं । अफरोड ड्राइभिङ र एड्भेन्चर टुरिजमप्रतिको आकर्षण बढ्दै जाँदा नेपालमा अफरोड क्षमतायुक्त एसयूभीको माग थप विस्तार हुने संकेत देखिएको छ। भारतमा आगामी वर्षहरूमा महिन्द्रा, हुन्डाई र टोयोटाले नयाँ अफरोड एसयूभी सार्वजनिक गर्ने तयारी गरेसँगै नेपाली अटोमोबाइल बजारमा पनि यस्ता मोडलप्रति चासो बढेको हो।
नेपालको पहाडी भूगोल, चुनौतीपूर्ण सडक अवस्था तथा क्याम्पिङ, ओभरल्याण्डिङ र साहसिक यात्राप्रतिको बढ्दो आकर्षणका कारण उच्च ग्राउन्ड क्लियरेन्स, फोर ह्वील ड्राइभ (4WD) प्रणाली र बलियो संरचना भएका एसयूभी लोकप्रिय बन्दै गएका छन्।
महिन्द्राले आफ्नो चर्चित अफरोड एसयूभी थारको फेसलिफ्ट संस्करण ल्याउने तयारी गरेको छ। नयाँ मोडलमा परिमार्जित डिजाइन, एलईडी हेडलाइट, कीलेस इन्ट्री, वायरलेस चार्जर र भेन्टिलेटेड सिटजस्ता आधुनिक फिचर समावेश हुने अपेक्षा गरिएको छ। नेपाली बजारमा थारले पहिले नै बलियो उपस्थिति बनाइसकेकाले यसको नयाँ संस्करण पनि आकर्षणको केन्द्र बन्न सक्ने अनुमान गरिएको छ।
यसैगरी, हुन्डाईले भारतीय बजारका लागि नयाँ अफरोड एसयूभी विकास गरिरहेको छ। प्रारम्भिक विवरणअनुसार उक्त मोडल पेट्रोल र पेट्रोल–हाइब्रिड पावरट्रेनमा उपलब्ध हुन सक्नेछ।
टोयोटाले पनि फर्च्युनरभन्दा तलको सेग्मेन्टमा ल्याण्ड क्रुजर एफजे सार्वजनिक गर्ने तयारी गरिरहेको छ। बडी–अन–फ्रेम संरचना, फोर ह्वील ड्राइभ प्रणाली र उत्कृष्ट अफरोड क्षमतासहित आउने यो मोडल नेपाली उपभोक्ताका लागि पनि आकर्षक विकल्प बन्न सक्ने विश्लेषण गरिएको छ।
