काठमाडौं । ललितपुर जिल्ला अदालतले टिकटकर तुलसा अधिकारीलाई पुर्पक्षका निम्ति थुनामा राख्न आदेश दिएको छ । बिहीबार (जेठ २१) जिल्ला अदालतका न्यायाधीश टेकनाथ गौतमको इजलासले उनलाई पुर्पक्षका निम्ति थुनामा राख्न आदेश दिएको हो ।
कुमार चिमोरियाको जाहेरीअनुरूपको उक्त मुद्दामा टिकटकर अधिकारीसहित १० प्रतिवादी छन् । प्रहरीले आपराधिक लाभ, संगठित अपराध र सम्पत्ति शुद्धीकरण (मनि लाउन्डरिङ) समेतको आरोपमा मुद्दा दायर गरेको हो ।
टिकटकर अधिकारीमाथि २१ करोड रुपैयाँ सम्पत्तिको स्रोत नखुलेको दाबीसहित सम्पत्ति शुद्धीकरणको अभियोग लगाइएको छ ।
एक वर्षदेखि फरार अधिकारीलाई शुक्रबार (जेठ १५) इन्टरपोलको सहयोगमा थाइल्यान्डबाट पक्राउ गरिएको थियो । अदालतको आदेशानुसार उनलाई प्रशासनबाट जेल चलान गरिनेछ ।
२१ जेष्ठ २०८३, बिहीबार १६:३६ मा प्रकाशित
