पटक–पटकको बाढीपहिरोले क्षतिग्रस्त बनेको विपी राजमार्गको काभ्रेपलाञ्चोक–सिन्धुली खण्ड पुनर्निर्माणको अन्तिम चरणमा पुगेको छ। यस वर्षको मनसुनलाई लक्षित गर्दै राजमार्ग अवरुद्ध भए अधिकतम आधा घण्टाभित्र सञ्चालनमा ल्याउने तयारी गरिएको डिभिजन सडक कार्यालय भक्तपुरले जनाएको छ।
कार्यालयका अनुसार केही दिनभित्रै पुनर्निर्माण गरिएका ट्र्याकबाट पूर्ण रूपमा सवारी सञ्चालन हुनेछ। बर्खाका बेला सडक अवरुद्ध हुन नदिन आवश्यक उपकरण, जनशक्ति र आपत्कालीन व्यवस्थापन टोलीलाई तयारी अवस्थामा राखिएको छ।
डिभिजन सडक कार्यालय भक्तपुरका प्रमुख सिनियर डिभिजनल इन्जिनियर सुमन योगेशका अनुसार सडक बन्द भए तत्काल मर्मत गरी ३० मिनेटभित्र यातायात सञ्चालन गर्ने लक्ष्य राखिएको छ। यसअघि रोशी खोलामा बनाइने अस्थायी डाइभर्सन बाढीले बगाउँदा पटक–पटक यातायात ठप्प हुने गरेको थियो। अहिले भने अधिकांश स्थानमा पुरानै ट्र्याक पुनर्निर्माण गरी सञ्चालनमा ल्याइएकाले जोखिम घटेको कार्यालयको दाबी छ।
हाल चौकीडाँडा–कटुञ्जेबेँसी–लाष्कोट–चारसयबेँसी–नार्के–चिउरीबास–बोक्सीकुना हुँदै पिप्लेसम्म पुरानै मार्गबाट सवारी सञ्चालन भइरहेको छ। यद्यपि चौकीडाँडा, चारसयबेँसी, घुमाउनेबेँसी, बोक्सीकुना, चिउरीबास, कालढुङ्गा र पिप्ले–बर्खेखोला क्षेत्रलाई अझै उच्च जोखिमयुक्त स्थानका रूपमा चिनिएको छ। ती क्षेत्रमा ग्राभेल बिछ्याउने, ठूला बोल्डर राख्ने तथा अन्य सुरक्षात्मक संरचना निर्माण गर्ने काम भइरहेको छ।
२०८१ साल असोजको बाढीपहिरोले भकुन्डेबेँसीदेखि नेपालथोकसम्म करिब ३० किलोमिटर सडकमा ठूलो क्षति पुर्याएको थियो। त्यसपछि चार प्याकेजमा विभाजन गरी पुनर्निर्माण अघि बढाइएको हो।
क्षतिग्रस्त बर्खेखोला–पिप्ले ३.२ किलोमिटर सडक भने **जापानी अन्तर्राष्ट्रिय सहयोग नियोग (जाइका)**को करिब २ अर्ब ६३ करोड रुपैयाँ अनुदानमा पुनर्निर्माण भइरहेको छ। यस खण्डमा माटो भर्ने, ठूला ढुङ्गा (बोल्डर) राख्ने तथा स्थायी संरचना निर्माण गर्ने काम तीव्र गतिमा भइरहेको छ।
कार्यालयका अनुसार पुनर्निर्माणपछि सम्पूर्ण सडक दुई लेनको हुनेछ। हालका पुलसँगै थप नयाँ पुल निर्माण गरिनेछ भने पाँचवटा पुललाई दुई लेनमा स्तरोन्नति गर्ने योजना पनि अघि बढाइएको छ।
धुलिखेल–सिन्धुली–बर्दिबास जोड्ने १६० किलोमिटर लामो विपी राजमार्ग नेपालको पूर्वी तथा मध्यपहाडी क्षेत्रलाई काठमाडौँसँग जोड्ने सबैभन्दा छोटो मार्ग हो। हरेक वर्षको वर्षायाममा सडक अवरुद्ध हुँदा यात्रु र मालवाहक सवारीले ठूलो सास्ती खेप्दै आएका छन्। यसपटक भने पुनर्निर्माणसँगै सडक सञ्चालनलाई थप भरपर्दो बनाउने तयारी गरिएको सडक विभागले जनाएको छ।
