बुढानीलकण्ठ अस्पतालले तिलगंगा आँखा अस्पतालको सहकार्यमा दुईदिने बृहत आँखा शिविरमा निःशुल्क औषधि, चस्मा तथा मोतिविन्दूको पहिचान गरिएको छ ।
नगर अस्पतालमा आयोजना भएको शिविरमा आँखाको चेकचाँज, आवश्यकताअनुसार औषधि तथा चस्मा वितरण र मोतिविन्दूका समस्या भएकाहरुलाई निःशुल्क शल्यक्रिया समेत गर्ने योजना रहेको बुढानीलकण्ठ नगरपालिकाका प्रमुख मिठाराम अधिकारीले बताए ।
नगरप्रमुख अधिकारीले नगरवासीहरुका लागि आँखा शिविर मात्र नभइ अन्य स्वास्थ्य सेवामा समेत पहुँच बृद्धि गर्ने योजनाअनुसार निरन्तर विभिन्न स्वास्थ्य सेवा दिइरहेको बताए ।
उनले भने, ‘मानिसको निम्ति सबैभन्दा महत्वपूर्ण अंग आँखा हो, आँखामा समस्या भयो भने जीवन नै कष्टकर हुने भएकाले नगरपालिका भित्र आँखा रोगसँग सम्बन्धित समस्या पहिचान गर्न पनि यो शिविर महत्वपूर्ण हुन्छ । यस नगरपालिकाका नागरिको स्वास्थ्यमा पहुँच बृद्धि गर्न पनि हामीले स्वास्थ्य क्षेत्रमा विशेष प्राथमिकता दिँदै आएका छौं ।’
नगरवासीको स्वास्थ्य सरोकारमा नगरपालिकाले यसअघि पनि विशेष प्राथमिकता दिँदै विभिन्न स्वास्थ्य सेवाहरु प्रदान गर्दै आएको बताउँदै बुढानीलकण्ठ नगरपालिका वडा नम्बर १२ का वडा अध्यक्ष शम्भु भट्टराईले आँखा शिविरले यस क्षेत्रका नागरिकको आँखा जन्य समस्याको पहिचान गर्न सहयोग पुग्ने बताए । उनले नगरवासीको स्वास्थ्य सरोकारका बिषयमा नगरपालिका सदैव सचेत रहेको बताए ।
अस्पतालका प्रमुख कार्यकारी अधिकृत गोपालप्रसाद पोखरेलले आफ्ना सेवाग्राहीलाई २४ घण्टे आकस्मिक सेवासहित विशेष स्वास्थ्य सेवाका कार्यक्रम अन्तर्गत बृहत आँखा शिविर आयोजना गरिएको बताए । उनले शिविरमा उपस्थित भएका सेवाग्राहीलाई आवश्यकता अनुसार सबै सेवा निःशुल्क प्रदान गरिने जानकारी दिए । बुधबार आयोजना गरिएको शिविरमा सेवाग्राहीको चेकजाँच गरी आवश्यकताअनुसार औषधि, चस्मा उपलब्ध गराइएको पोखरेलले बताए । उनले शिविरमा सहभागीहरु मध्ये मोतिविन्दूको शल्यक्रिया आगामी जेठ १३ गते निःशुल्क रुपमा गरिने जानकारी दिए ।
पोखरेलले भने, ‘पछिल्लो समयमा उमेरजन्य परिस्थितिले पनि आँखामा समस्या आउने गरेको छ । त्यसबाहेक मोतिविन्दू लगायत नयाँ–नयाँ आँखाजन्य स्वास्थ्य समस्या पनि देखिन थालेको कारण यस्तो खालको शिविर आयोजना गरिएको हो । हामी शिविरमा सहभागीहरुको सबैखाले उपचार निःशुल्क गर्दैछौं ।’
यस्तै, तिलगंगा आँखा प्रतिष्ठान बाह्य आँखा कार्यक्रमका अधिकृत महेश पराजुलीले बढी भन्दा बढी सेवाग्राहीसम्म सेवा प्रवाह गर्न बुढानीलकण्ठ अस्पतालसँग सहकार्य गरिएको बताए । उनले शिविरमा सहभागी हुनेहरुलाई पूर्ण रुपमा निःशुल्क सेवा प्रदान गरिने बताए । पराजुलीले ४० बर्ष उमेर पार गरेका हरेक व्यक्तिले अनिवार्य रुपमा एकपटक आँखा चेकजाँच गर्नुपर्ने बताउँदै मधुमेह र उच्च रक्तचापका विरामीले हरेक बर्ष आँखाको चेकजाँच गर्नुपर्ने सुझाव दिए ।
